Dekur og ungfrú óheppinÉg er orðin eymingjabloggari. Ekki gott mál, held ég. Blogga oft í hausnum en eitthvað er skortur á því að ég ,,færi" það yfir á netið. Vantar beintengingu þarna á milli.
Fór í dekur á laugardaginn í Nordica Spa í boði vinnunnar, fórum 5 dömur af skrifstofunni. Fékk lúxusandlitsmeðferð, alls konar krem og nudd sem fólst í því. Bakið var nuddað sem og hársvörðurinn og fór einnig í litun og plokkun. Þetta var glæsibær. Dörkuðum svo á Vegamót í lunch. Svona eiga laugardagar að vera. Ja, kannski fyrir utan eitt. Við skötuhjú flamberuðum humar um kvöldið. Hr. R hellti koníakinu á pönnUna og ég stóð tilbúin með eldspýturnar og kveikti bálið. Varð kannski heldur of mikill eldur... fann einhverja sviðalykt. Leit í spegil og sá að hægri augnbrúnin var örlítið krulluð efst. Ekki svo mikið mál. Verra var með augnhárin... greyin. Það er eins og að ég hafi klippt þau nær alveg niður. Ekki gott mál. Ég flamberaði sem sagt næstum af mér augnhárin hægra megin. Fuss.
Ég tek alltaf 3-4 daga í það að vera mjög óheppin á ári hverju, gerist yfirleitt í október/nóvember ár hvert. Klára óheppnisskammtin bara, vona ég. Fyrir utan flamberingUna á laugardaginn þá stillti ég klukkuna klukkutíma of seint á fimmtudaginn og missti af spinning tímanum sem ég var búin að lofa Sigurrós að mæta í. Fattaði þetta ekki fyrr en á leiðinni í ræktina. Frábært. Nú, svo á sunnudaginn ætlaði ég að nota nýja fína fjallahjólið mitt. Keðjan var laus þegar ég náði í hjólið en ég bara festi hana og af stað. Undirmeðvitundin spurði mig ,,er þetta nokkuð illur fyrirboði". ,,Hvaða vitleysa" svaraði ég og hélt af stað. Hefði betur hlustað á undirmeðvitundina; þegar ég var að hjóla í átt að Ægissíðunni flaug ég af hjólinu vegna hálku. Það var engin helv... hálka fyrir utan hjá mér. Þessi hjólatúr sem átti að færa mér hreyfingu og ánægju veitti mér marblett á mjöðmina og plástur á olnbogann.
Þessi óhöpp hljóta að vera búin, alla vega þangað til á sama tíma að ári.
Góðar stundir.
