Það er nefnilega það, allir út um allt
Menntaskóla vinkvenna hópurinn minn ber það skemmtilega nafn ,,Ömmurnar". Ekki verður farið nánar í hvernig nafnið var fengið. Ægilega skemmtilegur félagsskapur, finnst við þó farnar að verða full dreifðar um heiminn. Dagný er í Japan (að vinna í sendiráðinu þar), Þórhildur er í Bretlandi með sínum ektamanni en er að fara að flytja til Ástralíu og Skratthea og Íris eru í Danmörku. Gugga er þar líka. Huggun harmi gegn að við erum nýbúnar að endurheimta Ásdísi og Helgu úr 4ra mánaða Asíureisu. Við hinar erum dreifðar um landið. Kópavogurinn hýsir þó flestar okkar, eða fjórar talsins. Það er kannski spurning um að fara að horfa í aurana í þeim tilgangi geta lagt land undir fót og heimsækja þær Ömmur sem ekki eiga heimangengt í mánaðarlega saumaklúbbinn. Erum reyndar byrjaðar að safna fyrir Ítalíuferð næsta sumar, eigum þar pening inni á bók. Hann er þó fastur þar í umsjón Ásdísar. En þá er það ákveðið, best að byrja að safna fyrir Japansferð og Ástralíuferð. Einhvern tímann... Góðar stundir.